Que es una lovemark
28
Jun
2016

Lovemarks: marcas das que estamos namorados

Hoxe imos falar das lovemark, un termo que quizáis para algúns de vós resulte descoñecido, pero non ten nada de complexo e lograr que a nosa marca se posicione como unha auténtica lovemark traeranos moitos beneficios.

Que é unha lovemark

Este concepto foi creado por Kevin Roberts, unha das figuras máis emblemáticas da publicidade e o marketing e director de Saatchi & Saatchi, unha das axencias de publicidade máis grandes e innovadoras a nivel mundial. Kevin Roberts entende que as marcas deben posicionarse dentro dunha cultura concreta na que se desenvolven. Esta base é a chave para montar sobre ela toda a estructura da marca. A partir de aquí, a empresa busca atraer ó consumidor empregando os sentidos, para lograr unha relación con el o máis estable e fiel posible. Para que esta relación sexa posible é fundamental incorporar os sentimentos e as emocións na comunicación da marca, isto será o que atraia ós consumidores e axude a fidelizalos.

Por que é importante convertirse nunha lovemark

Na sociedade actual na que vivimos dispoñemos de multitude de produtos e servizos por cada categoría, pensa por un momento: cantas marcas de deterxente coñeces? cantas compañías de voos? cantas clínicas dentais? Non podes mencionar só un. A competencia é abismal, chegando a un punto onde apenas hai diferenzas entre as marcas a nivel de produto ou servizo. Entón, como facemos para decantarnos por unha ou outra marca? Polos valores, polo estilo de comunicación e polo que sentimos cara esa marca.

Converterse nunha lovemark ofréceche unha vantaxe sobre as outras marcas: diferenciación. Terás algo que os demáis non teñen, o teu público terá maior nivel de engagement, “amarán” a túa marca, sentiranse identificados con ela e non te abandonarán (tanto) coma ós demáis. Xa o dicía o propio Kevin Roberts: “o que move ós seres humanos é a emoción, non a razón”.

Cando se fala de lovemarks hai uns cantos exemplos que sempre se soen mencionar, porque son fáciles de comprender e todo o mundo ten claro por que e como esas marcas conseguiron chegar a ser amadas polos consumidores.

Apple: a gran lovemark tecnolóxica

Lovemark-Apple

O primeiro exemplo é Apple. A orixe de Apple non foi outra que crear un ordenador para o uso persoal e revolucionar o mundo da computación que existía ata ese momento, creando un ordenador para a xente que pensaba diferente (“think different”). Pero non só conseguiu iso, senon que creou toda unha cultura ó redor da súa marca, levando ata o extremo a capacidade de innovación e facendo realidade aquilo do que nos fixo partícipes Steve Jobs: Apple non ten clientes, ten fans.

Apple está por riba do prezo, das características do produto, da rentabilidade, da usabilidade que lle dará ó consumidor… Os seus clientes (fans) van máis aló de todo iso, son seguidores incondicionais da marca, confían plenamente nos seus produtos e saben que non lles van a fallar. Obviamente, é fundamental ter un bo produto e/ou servizo, do contrario por moito que intentes convertirte nunha lovemark será moito máis complicado que suceda.

A lovemark máis tatuada: Harley Davidson

Lovemark-Harley-Davidson

Outro gran exemplo de lovemark é Harley Davidson. Os seus consumidores non só adoran a marca e as súas motos, senon que tamén se consideran parte da marca, desa gran familia de moteiros, por iso non dubidan en tatuarse o lodo de Harley e amosalo orgullosos a amigos e coñecidos.

Esta marca non só ten un bo produto senon que ademais crea espectáculo: concesionarios enormes con infinidade de accesorios para as motocicletas, concentracións de moteiros, música propia, etc.

Harley Davidson convertiuse non que algúns deron en chamar “lifestyle brand”, formando toda unha comunidade ó seu redor e formando parte do estilo de vida de miles de persoas, un estilo de vida baseada na liberdade.

Así pois,todos temos as nosas propias lovemarks, que serán diferentes en cada caso pois cada un de nós considera unha marca como lovemark en función dos seus valores, da súa filosofía, da súa forma de comunicar ou por compartir unha historia con esa marca.

O fundamental destas marcas é que conseguiron crear vínculos emocionais, profundos e permanentes cos seus clientes, conseguindo un profundo grado de fidelidade, algo que busca calquera marca que se precie.

Leave a Reply